本來閒時寫吓Blog應該冇乜壓力嘅，但正因為蛇有蛇路，蟻有蟻路，好多人乘機透過佢個Blog問咗好多問題，仲不停有人邀請佢去出席講座，日前就聽聞佢瘦咗四磅，就係因為畀人「追到瘦」。

可能因為咁，尋日任總就喺Blog度實行公告天下，為好多朋友未收到佢嘅回覆而致歉，仲話真係估唔到退休生活仍然係咁忙碌喎。嘩！講到退而無休，忙到覆唔切咁，擺明係晒命啫！

佢仲話會盡快覆番啲朋友嘅提問或邀請，仲希望大家明白，佢未必每個邀請都可以接納。吓！仲咁揀擇添？佢話除咗時間嘅因素之外，佢覺得自己唔應該對香港嘅貨幣金融政策指指點點喎，以免影響政策嘅公信力，違反大眾利益。

咁又係嘅，正所謂不在其位，不謀其政，前財政司司長梁錦松早前就因為講多咗而即刻畀政府鬧嘞，搞到尷尬就無謂啦，不如慳番啖氣仲好。