白鴿黨立法會議員張文光兩公婆向來鍾意周遊列國，嚟緊農曆新年佢哋又有新搞作，計劃去以饑荒同內戰聞名嘅埃塞俄比亞旅行，即使出發前要連打三支防疫針都在所不計。今次佢哋仲搵埋黨友「高達」李永達同甘乃威兩啤人，實行三啤人一齊去非洲獵奇。
張文夫婦出名恩愛，高達同太太陳樹英雖一度因第三者而分開，但最終都走番埋一齊。問佢係咪想借助今次旅行同高達夫婦嘅經歷，幫鬧出「示愛風波」嘅甘威同太太修好？張文就笑而不答，只係話今次旅程仍喺籌備階段，唔知最後去唔去得成。
另外，工聯會議員KK黃國健亦計劃喺農曆年假同太太去日本仙台同青森玩，原因好簡單，就係早就應承咗太太。好彩工聯會啱啱決定咗杯葛五區補選，否則KK要被迫留港助選，老婆肯定唔高興。