稱人民幣未有耐自由兌換

肥亨認為人民幣有條件自由兌換，唔代表國家已準備去做，佢仲好抵死咁擺老婆上枱做比喻，話老婆一直都識煮飯，但可能驚整花個妝或整亂個髮型，所以唔肯下廚。言下之意，即係話就算人民幣已有晒自由兌換嘅基礎，但中央做呢個決定時仍要考慮好多因素。

自從中央舊年宣布要喺二○二○年將上海打造成國際金融中心後，唔少港人都擔心上海好快迎頭趕上，香港將被進一步邊緣化。肥亨話單睇北京奧運搞得咁成功，就知道中央要做嘅嘢一定會做到，所以都幾肯定上海會按時達標。但佢亦向在座學生大派定心丸，認為香港同上海嘅形勢唔係一個上、一個落，只要香港保持優勢，兩者其實可以同步發展。