何鍾泰呢番話喺建築測量界惹嚟好大回響，一班年輕建築測量師仲立即喺社交網站facebook成立群組聲討佢，又去信代表建築及測量界嘅立法會議員劉秀成，怒斥何鍾泰嘅言論不符事實，誤導公眾，強調建築測量師擁有全方位嘅樓宇專業知識，由起樓嘅項目策劃、樓宇設計同使用、維修保養，以至拆卸重建，都屬於佢哋嘅專業範疇，受到社會廣泛認同，要求何鍾泰作出更正澄清同公開道歉。

勢估唔到呢次驗樓起風雲，竟然搞到工程界同測量界火併咁喎！呢次何鍾泰闖出禍，真大鑊。

雖然劉秀成同何鍾泰都係建制派政團專業會議嘅成員，可以話係同門，但自己班選民畀人踩到上心口，就算係兄弟都冇面畀，亦都冇情講，一定要揸正嚟做。

曲線幫手補鑊

所以劉秀成一收到有關投訴後，已立即義正詞嚴咁去信何鍾泰要求澄清；對方亦好快覆番佢，話當時佢純粹想講屋宇測量師同結構工程師各有所長，如果講到樓宇嘅結構性問題同抽驗石屎，則以後者比較熟悉啲，可惜畀啲傳媒斷章取義歪曲咗佢嘅說話，強調自己絕冇批評或攻擊測量師之意。

劉秀成又話，佢係以專業對專業嘅身份去信何鍾泰，唔當對方係立法會同事或者政團盟友。咁最後何鍾泰都冇正式道歉噃！劉秀成話希望大家都唔好咁小氣，以免將小事化大。咁咪即係曲線幫何鍾泰補番隻鑊囉！