04/02/2010

播放本新聞相關短片

老師愈來愈惡 學校愈來愈亂

做家長都想仔女返學開開心心,有邊個想佢哋畀人糟質㗎?如果個金叵羅喺學校唔係畀人鬧就係畀人屈,而且仲係老師經手添,梗係要出聲討回公道啦。

講都冇人信,原來本港家長教師組織接獲投訴教師個案近年多咗好多。好似油尖旺區咁,淨係近半年接到投訴教師行為不當嘅個案,已經比舊年全年數字急升咗一倍六。有關組織話,投訴得最多嘅係老師出言侮辱學生。

講真,老師衝口而出鬧同學仔蠢、講極都唔明,甚至話佢哋「爛泥扶唔上壁」,已經難以接受啦。有位小三女同學條校裙污糟咗,老師竟然對佢講:「係唔係屋企太窮買唔起一件新校裙?」喂!條裙污糟咗啫,同貧窮有乜關係?做老師嘅居然以咁侮辱性嘅話嚟傷害小妹妹自尊,知唔知乜嘢叫為人師表㗎?

隨口亂噏不特止,有老師甚至被指「明屈」學生。有位中一學生見前面同學櫈底個飯盒好特別,貪過癮用手機影低。老師見到,話佢偷拍人哋裙底,唔聽解釋就要佢寫「悔過書」。

影個飯盒畀老師當鹹濕仔,而「悔過書」仲要寫明「承認使用手機偷拍女同學裙底,但因過分緊張而影錯放在椅下的飯盒」。嘩!生安白造,仲唔畀人哋辯護,好冤枉啫!

咁做直頭教壞細路啦,學校係作育英才嘅地方,老師嘅一言一行對學生成長有好大影響,如果仔女讀間咁嘅學校,畀啲咁嘅老師教,成績唔掂事小,學到是非不分、做嘢不擇手段,咁就認真大件事咯!

老師唔識教,最終受害嘅都係班同學仔。當局如果唔正視問題,後果不堪設想。正如北區家長教師會聯會負責人話齋,現職教師有必要接受再培訓,尤其係年輕教師,因為缺少經驗,講嘢唔諗後果,好容易同處於叛逆年齡嘅學生發生衝突。嗱,油尖區家長教師會聯會收到嘅投訴,七成同年輕教師有關,好明顯係培訓不足所致。

叮!至弊政府資源幾乎全部用晒喺添煩添亂嘅教改,為老師提供學生訓育及輔導證書嘅課程,學額嚴重不足。全港每年新入職老師約三千二百人,但呢啲課程學額得百幾個,首次報讀都要輪候至少兩年,再報讀嘅要等足五年。愈來愈多老師唔識教,家長、學生、老師之間嘅不信任愈來愈嚴重,你話有乜法子唔愈來愈多投訴吖。

香港教育問題多多,教學水平每況愈下,係人都睇到啦。計太一叮話齋,教學教學,唔識教點樣學?如果當局唔正視不當施教問題,唔盡快增加資源提高老師質素,再搞幾多教改都係嘥氣。試問港府仲要幾多學生做白老鼠至肯正視問題?叮!