全城矚目嘅千億官司落幕，近年極力擺脫風水師形象嘅陳振聰敗訴，尋晚仲畀警方拘捕帶署添，好多人都話陳振聰唔知算唔算到呢個結果呢？佢喺城中結識唔少名人，立法會專業會議成員石禮謙同佢相識二十載，尋日被問到昔日舊友係咪識風水時，佢連聲：「……得嘅！得嘅！」似乎要力撐到底！
大舊石尋日出席立法會大會，喺走廊同記者相遇，問到佢知唔知陳振聰單官司時，佢輕輕點頭話知，但就一副想走嘅樣，唔想打牙骹，我哋追住佢問對舊友官司敗訴有乜感覺時，佢仰天打個哈哈，唔肯接招，對腳卻繼續向前踏。後尾有人問佢陳振聰到底識唔識風水㗎？大舊石先企定，一連兩句：「得嘅！得嘅！」態度並唔含糊。
圈中風傳，大舊石同陳振聰相識已久，亦搵過對方指點一二，今時今日舊友雖然打輸官司、又畀警方查，但佢始終認同陳振聰嘅風水秘技，或者係咁，講官司佢一度想封口，但講風水就撐到底啩。