公社五名議員請辭之後，立法會議員得番五十五個，但立法會主席尋日打安全波，敲定立法會法定人數仍然維持三十人不變，費事第日畀人挑戰。不過，呢個決定搞到嚟緊嘅三月兩會好多問題，事關到時好多港區人大、政協都要上北京開會，立法會要確保湊夠法定人數嘅三十人開會真係唔易，流會風險好高，十四位要上京嘅議員年年都要兩頭騰，今年恐怕做硬空中飛人都似。
「兩會」期間，身兼港區人大、政協嘅議員都要上京開會，十幾個人飛走後，建制派幾乎陷入半真空狀態，今年兩會由三月三日同五日開幕，一直去到十三日同十五日，期間兩個星期三大會與星期五內會重疊，十四人上京後，法定人數又要維持三十個，流會兇手嘅罪人牌冇人願孭，有乜解救呢？
港區人大、工聯會黃國健（KK）話十四位上京嘅議員已經做好兩頭騰嘅心理準備，可能大家要抽籤，抽輸嘅七個就犧牲小我頻撲啲，返港湊夠人數開會，唔使十四個人綑綁式「班師回朝」。