工展會係本港廠商嘅傑作，今年香港個工會展入場人次創新高，會方計劃出年以八達通收入場費，費事市民大排長龍買飛入場。最近廠商會仲成功將工展會輸出去廣西南寧，喺當地搞咗個「香港時尚產品博覽會」，仲大收旺場添。
廠商會副會長兼展覽服務公司主席施榮懷尋日搞慶功宴，佢話此行啟發良多，事關初次喺南寧「開檔」，營業時間由朝十至晚九，點知每日下午五點後人流突然鳥獸散，原來全部返屋企開飯。施榮懷話當地人視晚飯大過天，仲要黃昏就開餐，一度令展場入夜後拍烏蠅。
好彩港商出名轉數快，急謀對策推出優惠，臨尾一日劈價大傾銷，結果六日展期共吸引逾七萬入場人次。當中以模型車、護膚品同家用品最好賣。施生仲話，南寧女士唔知「Foot Cream」（腳部潤膚霜）為何物，掃貨時寧買潤手霜都唔要腳霜喎。