本屆立法會組成之後，成立咗多個可用權力及特權法嘅小組，其中雷曼事件到家吓都未查完，但議員動用特權法嘅癮仲好大，尋日議會傾過民政事務局局長曾德成嘅「河蟹事件」同白鴿黨甘乃威好感事件係咪要用特權法，最後都否決咗。
富貴黨主席兼內會主席劉健儀（Miriam）話，特權法係立法會嘅「尚方寶劍」，唔應該隨意引用。又係嘅，武俠小說都有教啦，撒手鐧係到最後先拎出來㗎嘛，如果吓吓都出撒手鐧，呢件武器都唔夠神秘，更唔夠神聖啦。旅遊界議員謝偉俊都唔支持用特權法嚟查德成局長，但佢嘅理據係呢宗大澳女青年會嘅事係「翻版甘乃威事件」，只係甘威介入嘅係人哋嘅私事，德成局長就介入女青內部事務，調查都只係浪費公帑啫。
另一方面，調查甘乃威事件嘅委員會都決定暫時唔行使《立法會（權力及特權）》條例傳召女事主作供，但不排除將來再行使有關特權。