新春在即，好多人都會用傳統方式應節，廠商會前會長尹德勝係山東人，至今仲將山東菜視為團年飯首選，佢仲相約山東同鄉、水餃王后臧健和去美利堅京菜開餐，點一客清蒸鰣魚同山東餃子，每一啖都係山東濃情。
山東菜係北京菜嘅基調，講起食京菜，尹德勝最在行，佢自爆爸爸五十年代已開設京菜館豪華樓，曾邀請中國著名畫家張大千去酒樓傳授烹調雞鮑翅秘技。論識飲識食，山東人絕不遜色。講到最愛嘅菜式，尹德勝話非蒸鰣魚莫屬：「鰣魚食落較多骨，但魚味香、肉嫩滑，非其他靚魚可媲美。」尹德勝仲話，食山東菜多年，成日食醋，連傷風感冒都少啲。
臧姑娘就點咗味魚餃子，餡料用上了馬介休同杞菜，食時配上加入蒜蓉嘅山東醋，正到唔停得口。美利堅對臧姑娘意義深，佢話初來香港時三餐不繼，但每次思念家鄉時就會帶埋兩個女兒大擦一餐，破費一次，如今貴為水餃王后，就會請山東老鄉嚟美利堅作客。