高達廢噏搞錯廣告口號

工聯會會長鄭耀棠話過，要研究吓係咪要起訴公文袋同社民連兩黨用「起義」嘅口號，高達尋日有心炒作件事，問林公公有冇研究過一啲同樣用過起義、革命字眼嘅商業宣傳有冇問題，佢跟住舉可口可樂為例。有啲記性嘅人應該知道，「靜靜起革命」呢句宣傳口號冇錯來自汽水，但絕唔係可口可樂，而係一隻名為玉泉嘅飲品。人哋宣傳飲品靜靜起革命，同兩個喺政治場上苦心經營嘅黨派打出嘅政治口號根本係兩回事，咁樣攞嚟類比真係夾硬嚟啦。

不過，林公公一聽到革命，似乎已經腦充血，只懂以爛Gag回應，佢話自己近年怕肥，所以唔敢飲可樂，搞到有意刁難佢嘅高達唔知好嬲定好笑。

其實林公公如果高明啲，話畀高達知「靜靜地靜靜地要起革命」呢個廣告，賣嘅唔係可樂而係玉泉，咁就即時篤爆高達亂咁引用例子啦，但佢只懂以「謝絕革命」嘅方式話唔飲可樂，結果係誤中副車，冇革命嘅可樂畀佢無喇喇「革命」。

政改諮詢進入尾聲，立法會就政改嘅討論竟然係呢啲鬥嘴嘅層次，有乜辦法唔令市民心淡呀﹖