One Life One Mug

哨牙通輸咗官司，有人用「輸凸」嚟形容，實在有啲過分，你睇佢審完之後，冇潛水玩失蹤，又冇戴大頭佛電單車頭盔，仲以真面目示眾，唔到你唔服，佢嘅EQ真係高到冇朋友，正所謂輸人唔輸陣，你睇佢行出嚟個款吖，步履幾咁氣宇軒昂，笑得幾咁俊朗瀟灑呀，我發覺，佢今次不但冇輸到，反而贏咗好多人嘅迷戀添。

不妨話畀大家知，我準備幫哨牙搞番個「通哥狂迷後援交際組群」，簡稱為「通通援交群」，第一炮推出嘅就係好受廣大網民歡迎嘅Mug，靈感係嚟自證物出現過嘅水杯，相信好多人都恨咗好耐，好想要番個，依家只係印咗一個「烚熟Mug頭」就夠，命名為「One Life One Mug」，自用放枱頭固然凸顯出你嘅品味；用嚟送禮亦都大方得體，信我，情人節前夕插支劍蘭送畀隔籬Partition阿Candy Baby．A，實得米！

佬界齊嗌天地有正氣

哨牙佬爭產失敗，仲隨時可能大把手尾跟，或者因為咁樣佢焗住要上訴到底啦！睇嚟呢場好戲都仲未正式散場，大家仲有好多嘢睇……

事件發展到現階段，以哨牙佬暫時敗退收場。唔知大家有冇發覺，雖然呢千億裏面大家都分唔到一毫斗零，但係唔知點解，好多人，尤其係啲麻甩佬，都拍手歡呼，跟手嗌埋「天地有正氣」呢句口號上嚟。

點解會咁？一個擺得上枱面嘅原因就係，對手係慈善基金，惠澤社群。但係豪伯撫心自問，如果畀哨牙佬得逞穩袋成千億，咁我會心理唔平衡囉……雖然豪伯唔夠小白兄咁高大威猛，但係自問點都靚仔過哨牙佬啩？莫講話連十分一個富婆都識唔到，就算好心同個衰婆按摩，佢都好似唔係好領情咁。

所以話，呢單案同茅山搞嘢轉運案一樣，個官咁判法，相信全港佬界都會舉腳贊同！

網友觀點……

C C：哨牙都食得禾米多嘞，抵佢有今日！

Thomas：佢真係可憐，不如大家夾錢幫佢打官司！

天　人：真係大快人心呀，劈咗成晚慶祝！

Carlos：好耐冇試過咁開心，Yeah，Yeah，Yeah！