房屋署署長陳鎮源本來承諾過，合資格嘅災民可以申請公屋，但係又話要三、四個星期先至可以完成資格審查。喺呢段時間，災民就要暫時入住葵涌石籬中轉屋。災民覺得石籬中轉屋太殘舊，要求房署撥出深水埗蘇屋邨空置單位安置佢哋，仲要求日後可以喺原區安置。

不過，房署就企硬，話唔會動用蘇屋邨空置單位安置災民，因為嗰度已經截咗水電，仲話現時已經冇原區安置政策。房署仲用逐個擊破戰術，逐戶游說，令部分災民搬咗去石籬。

陳鎮源仲懶好心咁話，明白災民入住石籬中轉屋會有好多不便，但只係暫住幾個星期啫。

叮！講就梗係易啦，班災民就有排煩嘞。佢哋多數都係低下層市民，返工返學都喺土瓜灣附近，如果搬咗去石籬會好唔方便。正如有災民話齋，打份幾千蚊嘅工，每日做十二粒鐘，都夠晒辛苦啦，仲要坐咁遠路嘅巴士，嘥錢夾嘥時間，點頂呀。

講番轉頭，如果真係好快就可以上樓，只暫時住幾日嘅話，去邊度都冇問題。最怕嘅係，政府講就天下無敵，做就冇心冇力，氹你搬咗入去，然後就拖拖拉拉，令你有排都上唔到樓，咁就弊傢伙嘞。

都咪話唔擔心，房署淨係審查資格都要三四個星期，效率慢到好似蟻躝咁，就算連祖宗三代審查埋，都唔使咁耐啦。

俗語有話「冇乜嘢急得過死人冧樓」，屋宇署出事後派四十個專責小組巡查全港四千座樓齡五十年以上嘅大廈，既然可以特事特辦，咁點解房署唔可以加派人手，加快對災民資格嘅審查，等佢哋可以快啲入住公屋呢？

講真，災民乜嘢都冇晒，有啲人仲失去咗親人，已經夠晒慘啦，房署點解唔可以攞啲同情心出嚟，真心真意幫吓佢哋呀？就算對佢哋特別恩恤，都唔會有人反對嘅，相反，如果房署墨守成規，唔急災民之所急，一定會畀人哋狂炳，被指涼薄官僚。

待人處事一定要將心比心，試問房署各位高層，如果嗰班無家可歸嘅災民係你嘅屋企人或者親朋戚友，你哋仲會唔會咁漫不經心吖嗱？叮！