政改方案諮詢多時，港府有時出動司級官員行「三必」，希望加強諮詢效果，不過，市民嘅關注似乎愈來愈低。尋日下晝，兩大商會分別搞政改論壇，商務及經濟發展局局長劉吳惠蘭（Rita）亦落場推銷，為免順得哥情失嫂意，Rita要喺不足三個鐘內急趕兩場，真係走多幾轉都要頂硬上！
呢兩大商會分別係批發零售界同總商會商界聯席，其實背後嘅搞手正係富貴黨同分裂勢力經濟動力成員，呢兩大勢力對撼係人都知，連搞政改論壇都同日進行，舉行時間只係相差三個鐘，一個揀喺九龍油麻地，一個揀係港島金鐘，呢啲諮詢論壇通常都有致詞、聽問題到回應幾大環節，閒閒地都要玩幾個鐘，結果，Rita喺零售界個諮詢會坐到一半已經要起身離開，趕住準時出席總商會六點鐘舉行嘅論壇。
問責官員除咗要瞓身推銷，仲要睇通政治形勢，以免得失任何政黨，嚟緊仲有大把諮詢會，一眾高官真係有排交人。