中文大學數學科學研究主任、師承幾何學家陳省身嘅國際知名數學家丘成桐，獲頒○九年沃爾夫數學獎，係繼陳省身後，第二位獲頒呢個獎項嘅華人。
丘成桐家吓喺哈佛大學擔任講座教授，佢定於五月十三日親身前往以色列耶路撒冷領獎，屆時，佢會同另一名獲頒數學獎嘅美國教授分享十萬美元（七十八萬港元）獎金，獎項將由以色列總統頒發。
丘成桐其實喺七六年已經解決咗「卡拉比猜想」（Calabi Conjecture），其方法應用喺超弦理論中，八二年獲頒菲爾茲數學獎，今次獲頒嘅沃爾夫數學獎，評審委員會讚揚佢喺幾何學研究，對日後幾何學及物理學有深遠影響。丘成桐奪此獎確為華人爭光。
