飛機餐一直係簡單、冇味、只有飽肚功能嘅膳食，不過，向被視為名人飯堂嘅中環鏞記酒家都成為飛機餐嘅供應商。鏞記尋日再度與國泰航空合作推出中華美食飛機餐，老闆甘健成深明飛機餐要翻熱先食嘅缺點，諗出一系列愈翻熱愈好味嘅靚鵝菜式，加上鏞記嘅四款秘製醬汁，愈翻熱就愈入味，喺幾萬呎高空上都可享受鏞記嘅上等佳餚。
甘老闆話，燒鵝翻熱之後好難保持香口脆皮，所以佢特別想出五款飛機餐新菜式，包括陳皮鵝湯、紅棉（魚肚）陳皮湯、砂鍋梅子鵝、鵝肝腸滑雞煲仔飯同鹹菜鵝絲紮，再配合四種獨有秘製醬汁包括金豉汁、牛柳汁、宮保汁及沙茶汁，全部都愈煲愈惹味。
除此之外，甘老闆仲將市面甚少售賣嘅蝦子紮蹄重新推出，等啲飛機客可以食上有幾十年歷史嘅傳統食品，落咗咁多心機，唔知可唔可以改變飛機餐嘅固有印象呢？