建制派勢全面杯葛補選，了解內情嘅人話，杯葛呢招既令對手炒作唔到「公投」，又令建制陣營少咗好多爭拗，簡直妙用無限。建制派齊齊杯葛後，內部唔使因為協調打崩頭；建仔更唔使擔心為他人作嫁衣裳後、選票有去冇回；連商界保守派都趁機反對二○一七年普選特首。
建制派早排構思時，建仔同富貴黨喺新東、新西兩區爭持好激烈，富貴黨想出前主席田北俊同細佬田北辰，建仔就想催谷第二梯隊嘅葛佩帆同陳恆鑌，居中協調嘅人真係想唔頭痛都難，依家呢啲頭痛嘢全部唔存在，兩黨同協調人都嗌鬆晒。
最開心嘅仲有班建制派保守力量同商界人士嘞，事關佢哋一直反對取消功能組別，如果二○一二年政改又原地踏步，咁去到二○一七年，佢哋實有大條道理反對本港政制改革一步到位，即刻開始普選特首，到時廢除功能組別可能又行慢一步，所以家吓提起杯葛，好多人都拍爛手掌。