公民黨同社民連五個議員辭職擬發動「五區公投」，由法律基礎到補選問題都惹來好多批評，恒隆地產主席陳啟宗尋日講到呢件事，都狠批兩黨概念含糊，用成一億五千萬公帑去補選，更有枉費納稅人金錢之虞。
陳啟宗用早前港府興建高鐵撥款受到泛民挑戰為例，質疑泛民主派一方面猛鬧高鐵貴，反對興建，一方面又辭職，搞到政府要浪費一億五千萬元納稅人血汗錢嚟補選，佢話：「起高鐵又話貴，但係補選又用一億五千萬，簡直係掟錢落鹹水海。」
又係嘅，高鐵畢竟係連接兩地嘅公共基建，可以服務萬民，補選卻係填補幾個議席，呢筆錢本嚟可以唔需要用，公社兩黨話呢次投票係畀市民就政改揚聲，但公民投票嘅法律基礎欠奉、加上呢場補選分分鐘冇對手，再搞落去唔係嘥錢係乜嘢？