國際金融市場頭號大鱷索羅斯今日駕臨香港，出席一個喺香港大學舉辦嘅「與索羅斯對話」講座，問到金管局總裁攞命陳陳德霖會唔會去捧場，佢話唔會啦，因為今日有好多嘢做。
攞命陳返回金管局四個月，做番老本行後有人話佢表現即時生猛晒，喺立法會嘅表現比任總謙虛好多，獲得唔少好評，不過，攞命陳好謙咁話，唔可以人比人，佢只是表現一貫嘅風格啫！
佢日前公布外匯基金投資成績時，警告港人今年金融市場依然唔穩定，咁啱得咁蹺，曾經喺一九九七年狙擊港元嘅索羅斯又打算喺香港設立索羅斯基金管理公司，仲派咗兩位大內高手坐鎮香港，睇嚟佢哋未來都大把交手嘅機會。
