「畀人用棍追幾條街」

高鐵及「五區公投」爭拗以來，立法會建制同泛民陣營壁壘分明，尋日保安事務委員會開會，啲議員討論到上個月十六號晚表決高鐵撥款案時，立法會外秩序大亂嘅事，當晚被困多時嘅議員都喺會中分享吓個人經歷，工聯會嘅黃國健話，佢當晚同一個議員離開時，因為漏咗背囊要返轉頭，但佢一出到門外，就畀人爆粗、怒罵，佢仲爆有兩位早過佢哋離開嘅議員「畀人用棍追咗幾條街」。

據講當晚被「追咗幾條街」嘅議員係石禮謙同劉秀成，大舊石回應我哋查詢時話，當晚八點鬆啲離開立法會，的確有一名男子拎住嘢跟住佢哋行，仲用粗口鬧佢，但佢背住對方，已經唔記得對方手上拎住咩，去到文華酒店過馬路時先冇人跟，大舊石話自己聽慣粗口，「冇驚過、冇畀佢嚇倒」喎。不過，有議員就話太太好擔心，亦唔鍾意被人用粗口鬧。

啲議員你一言我一語，輪到余若薇發言時，佢狀似溫和，言語中卻質疑當晚有啲議員唔係走唔到，只係警方判斷嘅問題，呢句話令好多人不滿，有議員回應時好激動，不點名斥責有人話當晚「冇問題可以行出去」係講「風涼話」，明顯針對余若薇不知建制派議員嘅困境，又批評立法會外嘅示威者一見議員離開就粗口爛舌、推鐵馬，仲話：「呢啲唔係暴民係咩？」