不過，可能好快就冇呢支歌仔唱嘞，第日講唔定會乘興而去，敗興而回。點解會咁㗎？即係咁，如果將呢啲郊野公園當做如花似玉嘅大姑娘，佢哋依家已變成豆皮婆嘞。事關呢啲官地已畀人霸佔，又或者倒滿泥頭，破壞晒生態環境。

都話香港怪事多籮籮，官地無王管就係其中之一。近年非法傾倒泥頭、開墾土地嘅個案愈嚟愈多，無論係私人用地定係政府用地都深受其害。奇就奇在，當局追查非法使用私人土地時動作好快，一經查實就即時頒令要求修復，但係對官地被佔反而拖住唔理。難怪有環保團體狂炳當局雙重標準。

叮，有咁嘅事都唔奇嘅，私人土地被佔，地主一定會投訴，當局唔可以當人哋冇到。但係官地係政府自己嘅，政府唔介意，就冇人理㗎喇。偏偏管理官地嘅地政總署又出晒名係大懶蟲，幾時都係少件事好過多件事。

嗱，又有環保團體踢爆有三幅官地被非法開墾，成三年都冇人理。第一幅喺清水灣岩頭沙，○七年初就畀人非法開咗一條百四米長嘅路，一頭一尾都鋪咗石屎；第二幅喺西貢竹角，非法開闢咗兩公里長嘅山徑；第三幅喺大埔山寮，非法鋪咗五百米水泥路。呢啲非法開墾範圍都經過自然保育區或者郊野公園。

叮佢個鎯鎯，咁樣亂搞一通，最靚嘅景觀都糟蹋晒啦。更弊嘅係，環保團體投訴過好多次，地政總署硬係唔肯修復呢啲官地。其實呢啲只係冰山一角咋，有數字顯示，過去五年，官地被非法佔用嘅個案共有二千幾單咁多。真係唔講唔知，一講嚇一驚。

好似馬鞍山有幅官地被佔用做燒烤場，經營者猛咁砍樹擴展營業範圍，噪音問題更長期未解決。地政總署根本冇檢控，係咁意勸喻吓就算。將軍澳坑口嗰幅官地仲慘，做咗廢物回收場，四圍都係廢紙、廢鐵同埋雜物，仲惹嚟大量蛇蟲鼠蟻，搞到附近居民不得安寧。

話時話，咁烏煙瘴氣都唔理，地政總署係咪食塞米㗎？講鬼咩，呢班官僚一味欺軟怕硬，佔官地嘅多數都係有頭有面嘅人，佢哋點敢出聲呀。例如煲呔曾表弟香灼璣，佔咗一幅用嚟起倉庫嘅官地，改變用途建豪宅，住咗二三十年，當局一於當睇唔到。

你做初一，人哋做十五，官地被佔個案自然就愈嚟愈多。請問地政總署署長譚贛蘭，唔通真係要泥頭車開到入禮賓府，霸佔埋嗰個錦鯉池，你哋先至肯做嘢？叮！