早前被踢爆平等機會委員會無人駕駛後，政府隨即補鑊，急急公布由林煥光接任此職。林煥光為官三十年，位至特首辦主任，○五年初因被傳媒揭發有婚外情而請辭，離開政府。冇做官五年，佢尋日首日返新工，形容自己好似學生放假後復課咁。
林煥光形容自己係學生，咁平機會應該係Band 3學校嘞，事關平機會出咗名內部管治爛透，舊年四月更被審計署力數多宗罪，政府委任林煥光入去都係想佢清除機構內嘅毒瘤，所以佢返學之後，梗係要着手掃清前主席鄧爾邦留低嘅蘇州屎。
佢尋日仲話會再同平機會委員溝通，研究加強工作，例如提升透明度。其實佢早前都約過班委員茶敍，但唔少委員都對忽然空降嘅佢有抗拒。睇嚟平機會嘅舊生對林煥光呢位久休復課嘅新同學冇乜好感，咁佢要先下苦功搞好啲內部關係至得嘞。
不過，以林煥光以前喺政府學到嘅管治經驗，應該爛船都有三斤釘，市民必定會金睛火眼
住佢，以免佢又好似鄧爾邦咁將啲公帑掉入鹹水海。究竟林煥光能唔能通過考試？就要拭目以待嘞！