本文重點
相信大家仲記得恒指報價上月中罕有咁出現故障，令報價停頓咗半粒鐘。香港話晒係國際金融中心，竟然咁都可以發生。立法會財經事務委員會主席陳鑑林當日已即時去信恒生了解事件，仲要求對方喺今個禮拜內向委員會提交調查報告。
喺尋日嘅財經事務委員會會議上，經濟動力嘅Jeffrey林健鋒自言了解過恒指報價故障事件，認為呢個只係電腦程式出現問題，唔涉及人手操作不當又或病毒入侵等問題，加上今次事件冇造成嚴重嘅交易問題，所以覺得都係先睇完報告結果，委員會再定下一步點做。
點知Jeffrey呢個大事化小嘅態度激起白鴿黨涂謹申把火，阿涂提出極度挑釁嘅質疑，話：「我見林議員好似有埋份報告咁，又話技術有問題，如果有資料不如畀埋我哋啦。」
要求睇番會議逐字記錄
聽到阿涂咁講，Jeffrey好似按正佢痛處咁，當堂黑晒面仲好大聲咁反駁：「我希望同事開咗耳朵聽嘢，唔好亂咁噏！」
Jeffrey強調自己冇講過阿涂指控嗰番話，之後仲句句有骨咁單打阿涂「瞓緊覺唔清醒」，結果雙方鬧到話要睇番會議嘅逐字記錄，最後要由陳鑑林做和事老，勸佢哋唔好拗先平息到呢場無謂火併，而委員會最終決定將恒指報價故障事件擺落下次會議議程。