離開官場後嘅公務員事務局前局長王永平不時都會批評政府施政失誤，最近佢去咗港大教書，尋日出席港大「中國傳統倫理與宗教研究計劃」記者會時，竟然由「庸官殺手」變咗「翻生孔子」上身，大談應該向呢班後生仔教多啲中國傳統倫理道德。佢仲話自己不時寫文章發表意見鬧政府，就係要好似以前擔任諫官嘅士大夫咁，鬧醒班港府高層要體察多啲民情。

平叔話中國幾千年傳統文化有唔少好嘢，後生仔千祈唔好以為老土，佛家道家講唔好殺生、清靜無為，更比時興嘅環保同保護瀕危物種早幾千年。佢睇《論語》時亦發現，孔子本人一啲都唔死板，仲周不時有關心學生甚至同學生講笑嘅場面出現，係後來儒家思想畀統治者高舉「君君臣臣父父子子」先變成管治工具。跟住平叔仲語帶雙關咁話，儒家一早就有「民為貴、君為輕」嘅概念，如果掌權者愛民如子，為官者無懼直諫，又點會出問題呢？

當權者應包容年輕人激情

呢段說話簡直一矢中的，唔使多講，大家都明平叔喺度寸緊邊個啦！若果煲呔曾真係急市民所急、想市民所想，又肯聽唔同意見嘅話，大家就可以安居樂業啦，但弊在佢倒行逆施，忠言逆耳，搞到民怨沖天呢！

平叔之前都做過教統局局長，依家又教埋書，一定比煲呔曾更了解年輕人嘅想法。佢話年輕人有理想、有激情係好正常，雖然未必百分百啱晒，但社會以至掌權者都應該包容佢哋。平叔更直言有人話依家後生仔行為激烈，「咁五四運動嗰陣咪仲激」。

好明顯平叔係插緊煲呔曾唔夠包容，亦冇真心聽過班「80後」青年嘅訴求，所以先搞出早前高鐵撥款發生警民衝突咁大鑊啦！