死撐風骨令人欽佩

某份自己話自己「公信第一」嘅報紙，日前刊登咗篇題為《「反高錕大聯盟」成立》嘅小文，本來想食字玩「反高鐵大聯盟」，點知網民信以為真，插到反艇。呢份報紙之後登澄清啟事，卸得就卸咁話係「星期日副刊組策劃的虛構性諷刺文章，並非新聞報道」，字裏行間唔多似有歉意，反而仲有少少怪啲讀者低B睇唔出佢哋玩曲筆而胡亂炒作。今次見識到乜嘢叫做識字分子小報嘅死撐風骨，真係令人肅然起敬。

不過網民有時又係嘅，使乜咁大驚小怪啫，其實只要睇睇呢份報紙一年到晚都要刊「更正與澄清」，就知道幾乎任何時間都係唔認真、大部分報道都係玩玩吓啦，我建議不如喺報頭隔籬加多條「本報只刊虛構性諷刺文章，並非新聞報道」，咁就唔使下下澄清咁煩吖嘛。

「公信」招牌灰飛煙滅

高錕攞咗諾貝爾獎，絕對係華人之光，點知關公都有對頭人。自詡「公信第一」嗰份報章登咗篇題為《「反高錕大聯盟」成立》嘅文章出嚟，話「全港各界已做好準備，組成『反高錕大聯盟』，據悉可能發動『圍堵高錕大行動』」喎。

點知過咗冇幾耐，呢份「公信第一報」竟然出嚟澄清，話呢篇文章只係「副刊諷刺性文章」，大家當不得真喎。真係唔解釋猶自可，你篇文大大隻字寫住「明報專訊」，咁都可以用嚟講笑，咁即係自己都唔尊重自己招牌啦，況且睇勻成篇文，根本都唔知有乜諷刺意味。

如果咁都解得通，下次佢哋不妨搶先獨家報道又有唐樓冧咗啦，肯定點擊率勁升，最多之後補番句話係諷刺性文章囉。諷刺乜？梗係你班友咁蠢仲睇呢份報紙啦！

網友觀點……

小　文：呢份報紙嘅文章玩得水皮，唔知幾時講真，幾時講假。

SS：好心唔好玩人啦，恰一個老人癡呆，真係唔可以接受。

小　生：自從冇咗大俠之後，呢份報紙可以不理啦。

小　黑：都幾好睇吖，份報紙好多錯字，玩吓捉錯字遊戲都唔錯。

chu chu：以前先生成日逼我哋睇呢份報紙，但從來唔見佢哋自己睇。