下次清明見到銀行前面打晒蛇餅，咪以為擠提呀，可能係孝子賢孫排隊拜祭咋。唔講唔知，近排好多銀行保險箱已經變咗骨灰龕嘞，愈來愈多客戶因為輪唔到政府龕位，又唔想將先人骨灰放喺屋企，存放私人龕堂又驚犯法，索性「存銀行」，將骨灰放入保險箱。

掂噃！銀行守衞森嚴，保安絕對有保障。最緊要係租金夠平，年租由幾百到二千幾蚊不等；而且選擇夠多，尺寸有大有細，正一豐儉由人。有殯儀業界人士睇準商機，推出適合存放唔同尺寸保險箱嘅袖珍骨灰龕「應市」添。嗱，以一間銀行有過千個保險箱計，全港銀行出租嘅保險箱有成十萬個，唔憂冇位啦。

咪住，銀行唔係龕堂，掂唔掂㗎？查實，銀行已經將骨灰視為「滋擾性物品」，一旦發現，會要求客戶將骨灰搬走，甚至可能會提出法律訴訟或索償。雖然銀行無權跟住客戶入保險庫，無從知道保險箱放咗啲乜，不過如果因為咁惹上官非，直頭得不償失啦。

再講，將骨灰放喺保險箱，風水都唔多掂。有玄學家話，保險箱空間太窄，又畀金屬包住，先人無法吸納氣場，庇護唔到後人。另外，先人冇香火供奉，難以安息，成日喺保險庫遊蕩，如果啲現金好神奇變埋陰司紙，咁咪大劑？

叮！保險箱本來係攞嚟放金銀珠寶同貴重物品，居然變咗骨灰龕。話到尾，都係港府好帶挈啫。政府骨灰龕長年供不應求，全港依家有十六萬八千個公眾骨灰龕位，只得三百個吉位，但輪候人數過萬，平均三十三個人爭一個位，閒閒地要等二到五年至輪到。

等唔到嘅，惟有幫襯私人龕堂，但位置好嘅要幾十萬一個。收費昂貴不特止，由於政府監管不力，呢類龕位唔少都係違法經營，辛辛苦苦搵到塊「安身」之地，好可能未「入伙」已經變咗爛尾，真係唔知點算。

當局話搵地方起骨灰龕，一遇到有人反對就變縮頭烏龜，令供求失衡問題愈來愈嚴重。港府無計可施，淨係識包船催谷海葬，細眉細眼又唔止咳，簡直嘥氣。

市民先人「死無葬身之地」，當局乜都唔做，大家惟有各出奇謀。正如有市民話齋，食衞局局長周一嶽講過，骨灰唔會影響健康同環境衞生，於是咪諗到將骨灰放入銀行保險箱囉。

叮佢個鎯鎯！家陣農地、停車場、村屋、安老院、甚至銀行保險箱，乜都可以變骨灰龕，再咁落去，香港遲早會變成骨灰港！