由白鴿黨等十一個泛民政黨同團體組成嘅「終極普選聯盟」，尋日就喺旺角行人專用區搞咗個聯署簽名啟動禮，希望集結市民簽名，要政府交出普選路線圖，但白鴿黨主席「鐵頭仁」何俊仁就唔知點解係咁搭錯線。

鐵頭仁、該黨副主席劉慧卿同民協馮檢基等幾個立法會議員都有為聯盟站台，但簽名枱前始終冇乜人氣；見到群眾反應冷淡，鐵頭仁於是落力叫多幾句口號，但唔知係咪仲未熟習呢個新組織，佢竟然將「終極普選聯盟」講錯咗做「終極民主聯盟」，仲係唔為意咁一錯再錯，錯咗幾次後，卿姐忍唔住出聲提點，佢先改口，點知轉頭又講錯做「終極補選聯盟」，同原本想爭取嘅「真普選」完全離題。睇嚟鐵頭仁日後再為聯盟站台時，都要好好記熟個名先得嘞！