由建制派發起嘅「政制向前走大聯盟」尋日喺灣仔修頓球場外收集市民簽名，煲呔曾竟然聲稱「順路經過」，同政制及內地事務局局長林瑞麟、特首辦主任譚志源等突然現身撐場。但據聞，身為大聯盟召集人嘅工聯會會長鄭耀棠一星期前已邀請佢出席，難怪佢嘅出現冇嚇親大家。
但奇就奇在喺煲呔曾出場前十分鐘，突然愈嚟愈多市民魚貫入場、排隊簽名，原本冷冷清清嘅攤位突然熱鬧起嚟。其後仲發現班簽完名嘅市民好有組織咁一齊返去修頓球場嘅看台坐低，唔知喺度等乜嘢？
究竟係大聯盟嘅號召力大吖，定係有人悉心安排為煲呔曾造勢呢？問過有份出席簽名活動嘅行政會議成員劉江華，佢就幫呢條投票人龍解圍，話簽名運動向來都係咁，有時得幾丁友，有時有十幾二十人，所以「忽然墟冚」嘅情況冇乜咁奇喎。