本文重點
因為馬頭圍道冧樓事件，發展局局長林鄭月娥日前自爆為咗度橋瞓都冇得瞓咁滯。當大家以為佢趁尋日假期「叉叉電」，預備今日起金睛火眼睇實補鑊嘅驗樓行動啦，點知佢喺傍晚如常應邀出席露宿者行動委員會一年一度搞嘅聯歡晚會，同成場逾百名露宿者提早拜年，睇佢個樣一啲都唔似瞓唔夠喎！
喺災民隔籬聯歡
其實林鄭同露宿者行動委員會早喺佢○○年至○三年擔任社會福利署署長任內結緣，就算之後步步高陞，○七年做埋問責局長，佢都堅持每年返一返去見吓佢口中呢班「老友記」，所以就算啱啱發生死人冧樓咁大件事，佢都冇失約。
不過咁啱搞聯歡晚會嘅地點就喺梁顯利社區中心，同入住庇護中心嘅冧樓災民只係咫尺之遙，林鄭會唔會去探吓佢哋？佢就話「今日以朋友身份出席活動」，而且已經有同事幫緊佢哋，唔會打攪佢哋嘞！