據了解，主管港澳事務嘅中央港澳工作協調小組喺二十二日開會，認定公社兩黨係有預謀、有計劃咁喺香港推動「公投法」，形同搞港獨，事態嚴重，於是決定強硬對付，調整戰略，傾向要建制派轉為全面杯葛，全力炮轟。富貴黨翌日宣布唔參加補選就係收到風聲，衡量過若冇建仔嘅鐵票，富貴黨單打獨鬥根本毫無勝算，就算贏唔到議席，起碼贏姿態。

公社兩黨話如補選投票率高過五成，「五區公投」就算成功。富貴黨前主席田北俊日前估計五區總辭後，若然建制派杯葛，整體投票率可能只得一成幾。田少如果唔係收到風，就梗係識得鐵板神算，事關建制派唔玩補選，目標就係要將投票率按到得番一成上下嘅水平。

根據建制派嘅計算，公社兩黨攞唔攞得番○八年兩黨合共取得嘅三十六萬票都成問題，即使攞到，以全港三百三十七萬選民計算，投票率就係一成左右，到時建制派就可以話選民以唔投票嚟投票反對香港搞公投，相信公社兩黨都好難撐落去囉。