陳校長尋日罕有咁現身沙田馬場。咪誤會，校長唔係爛賭，入場純粹應馬會大董陳南祿邀請食餐飯啫！講起會唔會聯同其他大學校長拜會高錕，陳校長耍手擰頭話未聽聞有呢個安排，但佢自爆同高錕好有緣，二十年前當佢喺美國加州大學教書時曾到訪中大交流，認識時任校長嘅高錕，兩個人仲打咗場網球友誼賽添！

馬場另一位稀客就係食物及衞生局常秘Sandra李淑儀，佢唔識刨馬，只係趁熱鬧落注買咗馬會大董陳南祿隻愛駒「時時有機」，結果有斬獲，「時時有機」跑第二。至於贏咗幾多錢，Sandra話唔方便講喎！