財爺鬍鬚曾早前去咗個青年論壇開幕禮，大會仲特登喺開幕禮前安排咗十幾個「80後」青年同佢對談十五分鐘，咁啱在座有個參加者張智峰曾經參加過反高鐵苦行。

呢位張同學喺會後話同鬍鬚曾傾過創業挑戰同點樣解決失業問題，認為鬍鬚曾肯出席係誠意表現，但會面時間咁短，批評鬍鬚曾做公關騷，討論流於表面，本來想講高鐵，因為時間唔夠冇機會講。

唔知係咪睇完相關報道條氣唔順，鬍鬚曾尋日喺個人網誌再提舊事，主動提及傳媒報道中呢位同學，仲好親切咁稱呼呢位張同學嘅洋名Johnny，又形容Johnny係中文大學二年級學生，斯斯文文。

鬍鬚曾又引述Johnny話佢聽讀緊化學系，而佢就話依家香港生物化學科技產業迅速發展，佢畢業後喺呢方面大有發展機會，跟住仲話佢同Johnny都同意同學畢業後，發展唔一定要局限於佢哋主修嘅學科，仲話佢就係其中一個例子。

咁就離奇嘞！張同學明明鬧爆鬍鬚曾做公關騷，但鬍鬚曾講到好似同呢位同學睇法好一致咁。究竟件事嘅真相係點呢？版本個個都唔同，簡直就係羅生門。

讚「90後」學弟有深度

另外，鬍鬚曾早前去煲呔曾母校香港華仁書院，同煲呔曾啲「90後」學弟講點樣制訂預算案，記得佢仲叫啲學生慳啲使，但喺網誌度佢大讚班學生，話佢哋令佢印象深刻嘅地方，係佢哋對社會問題嘅廣泛同深度，由能源、環保、保障少數族裔，仲有啲年少老成嘅問題等等，對呢班同學關心社會嘅熱心感到高興喎，又話雖然交流時間不足一粒鐘，但就令佢開心咗半日。

嗱！睇完兩段故事後，鬍鬚曾好明顯係同「80後」扮Friend，再冧埋班「90後」啦！