小白觀點：Kindle都可睇中文書

○九年尾最稱心嘅Gadget係Amazon Kindle，呢部機觀望咗成年幾，早排聽到佢哋打通International，有埋免費3G，唔單止可以即時買英文電子書，仲可以隨時隨地上網。天下間係冇免費午餐嘅，據講數據當Roaming計，由Amazon埋單，小弟上個月去台北行咗轉，日用夜用，我估Amazon找數時真係喊咁口。

好多人以為Kindle冇中文版望而卻步，查實話咁易Crack咗啦，網上大把免費電子書，連最新嘅《1Q84》都有，啱啱《麥田捕手》作者死咗，用Kindle重溫番，冇得頂。如果多幾個我呢啲客戶，Amazon好快摺埋。係喎，乜唔係講緊iPad咩？唉，我呢種有獨立思維嘅人係唔會同人癲嘅，依家見到周街都係iPod，變成一個人類器官咁，仲要無時無刻外露，睇見就眼火爆，遲啲仲要一人整多塊夜安護兼冇翼嘅Pad？咪搞！

sunsiupak@gmail.com

阿豪觀點：i乜i物唔使咁早買

iPad強勢出擊，唔知大家會唔會買，但係老實講豪伯就有啲保留啦。千祈咪誤會喎，豪伯都可算係i字頭家族嘅fans，淨係之前嘅iPod都已經有兩部。依家電話都係用緊iPhone，正如有唔少網友所講，佢個體積大過iPhone咁多，但係又冇得打電話，到底係咪真係咁好用呢？好嘞，今次我又追部iPad，第時佢再推出「iMat」甚至係「iPet」，仲得掂嘅？

其實香港人咁精叻，多科技產品都係睇吓口碑至決定入唔入貨。好似豪伯個朋友咁，一知道講呢個topic，即刻好熱心咁慫恿豪伯立即買。哈，你估我唔知佢籠嘢咩，無非都係自己心思思但係又想搵人做白老鼠。但問題係，大家個心地都唔係咁好，大家不妨撫心自問，你睇完一套垃圾電影之後，係咪第一時間有衝動想「推介」畀所有至親好友先？

lukchiho75@hotmail.com

網友觀點……

李怒冒：咁咪即係一部大啲但唔可以用嚟打電話的iPhone！

豬　神：真係好吸引呀，趁依家價好，Trade咗部iPhone先！

微　硬：蘋果又出新嘢，有冇搞錯呀？叫人點追？

Antonio Hui：掛牆一流。：)

無產階級：反對買iPad，不要做生產商嘅奴隸！！！

SMS傾埋一份：6016 2496