好多人都話香港近排當黑，睇嚟唔到你唔信。尋日風平浪靜，既冇八號風球，亦冇黑色暴雨，更加冇地震，但係土瓜灣馬頭圍道呢座五層高舊樓話冧就冧，造成多人死傷，場面之震撼，令人驚心動魄。

今時今日，香港人真係毫無安全感可言，行行吓街，唔係隨時遇上亡命飛車，就係鏹水彈從天而降，真係一步一驚心。咪以為邊度都唔去，留喺屋企就平安無事，好似今次失驚無神冧樓，死咗都唔知發生乜嘢事。

以前就話戴鋼盔行騎樓底最安全，但依家呢招已經out咗喇，因為戴鋼盔根本防唔到鏹水彈。所以，早兩日太一叮曾向各位推介最型仔嘅保護裝束，即係奇連伊士活嘅經典服飾，一身獨行俠打扮，戴頂墨西哥闊邊帽，加上飄逸披肩，將自己由頭包到腳。

可惜，講咗唔夠兩日，就發現扮獨行俠都唔係好掂，因為無論你包到幾密實，扮得幾型，大吉利是遇到冧樓，照樣死人。咁點算呢？太一叮又有新橋，大家不妨扮鐵甲威龍喇，有咗金剛不壞之身，冧樓都冇有怕，照樣破土而出，飛越九重天。

叮，香港處處都係殺人陷阱，都唔知邊度至安全。本來呢，禮賓府應該冇問題嘅，可惜依家連呢個最後堡壘亦變咗冇掩雞籠。呢，有班「八十後」玩轉禮賓府，開BBQ又得，玩錦鯉又得，仲將啲相放上網公諸同好添。好彩呢班「八十後」唔係恐怖分子咋，否則，後果就不堪設想咯！

話時話，香港家陣有邊樣嘢安全o架？食嘢驚走私毒菜，搭車驚亡命飛車，搭電梯驚斷纜，出街驚鏹魔，去公立醫院睇病驚醫生斷錯症，依家連驚爆內地嘅「樓脆脆」、「樓歪歪」都有埋香港版，上演「樓冧冧」，仲搞出人命添。大吉利是講句，好彩豬流感唔係想像中咁犀利啫，如果好似沙士咁勁，靠呢班無能庸官去應付，睇怕死得人多咯。

古人相信天人感應，認為天降異兆，就係上天向人類示警。近排香港發生咁多天災人禍，大家千祈唔好唔信邪，庸官治港，倒行逆施，搞到天怒人怨，乜嘢事都有可能發生o架。如果當局唔好好反省，改善施政，天災人禍必定陸續有來，無辜市民惟有自求多福喇。