本文重點
公文袋陳淑莊（Tanya）辭咗立法會議員一職後，尋日首次以前議員身份參加公開活動，佢去香港大學政制發展論壇時，喺席間趁機推銷五區「公投」，但佢開口冇耐，學生主持覺唔對路，好客氣咁截停佢，提醒佢講番政改方案，即係暗示叫佢唔好趁機宣傳，Tanya惟有乖乖就範。
決定辭職後當黑
Tanya做咗兩年零三個月立法會議員就辭職，心口好似掛個勇字咁，點知首日出征已不利。講番轉頭，佢似乎決定辭職後就好當黑，先係辦事處畀人離奇爆門，繼而跟樂施會去內地宣傳後一直作病，辭職後，佢更透露發燒兼喉嚨痛添。論壇之後，Tanya都幫襯為海地地震籌款嘅義賣蛋糕攤檔，仲捐咗六百蚊添。
佢尋日又話前日係最後一日議員生涯，當日共收到政府五封回信，主要係回覆佢早前以議員身份追問政府嘅嘢。Tanya話可能政府入面嘅有心人知佢就快辭職，專登早啲覆信，令佢好感激。