根據「肥仔」帶朋友玩轉禮賓府嘅相可見，佢哋遍遊花園、錦鯉魚池、會客廳、大禮堂、會議室、廚房同廁所，○六年至○八年任特首辦特別助理嘅克勤仔講句公道話，話呢班「八十後」闖入嘅地方，其實大部分喺禮賓府開放時都畀公眾遊覽同影相，但會議室、魚池同廚房就例外。

特定文件鎖入金屬櫃

至於嗰啲不速之客有影到嘅一個儲物櫃，原來大有來頭，呢個儲物櫃放喺禮賓府地庫嘅會議室外面，司局長每日入去開早禱會前，都要「繳械」交出手機，鎖喺櫃入面，防止會議機密被人透過手機對外洩露。克勤仔仲話，特首辦員工喺禮賓府出入都必須戴工作證，進入唔同區域嘅辦公室時，更加要額外用電子通行證，先至可以通過；放工時就要將辦公室鎖上，特定文件更加要規定鎖喺金屬文件櫃入面，以策安全。可惜吖，呢啲嚴密保安都畀神通廣大嘅肥仔破晒！