反高鐵一役凝聚唔少「80後」，社會上對佢哋嘅行為有好多睇法，早喺立法會表決撥款案前，沙士英雄兼中文大學校長提名人沈祖堯曾經話「80後」表達意見嘅手法「唔算激」。不過，沈祖堯尋日出席一個活動時，講起同一單事件，佢就話任何人都應該守法。似乎為人師表兼將做校長嘅佢都嚴守禮法，堅持年輕人表達意見時必須守法，佢仲用美國前總統甘迺迪嘅名言，勸喻年輕人諗吓自己可以為國家做啲乜！
沈祖堯尋日出席寧波第二中學畢業暨頒獎禮時話，年輕人對社會承擔好重要，總好過關心娛樂新聞或茶杯裏嘅風波，但佢強調「表達意見時應遵守法治」，仲話年輕人應經過思考同論證先對社會時事作出評價。
講到「80後」嘅問題，佢分析指佢哋有訴求皆因○九年畢業生較十年前畢業生嘅薪金仲要低，成為埋怨社會嘅主因，但佢勉勵年輕人話，每創造一件事物，都要經過萬次失敗先能成功，要懂得承受挫折。