今日係農曆十二月十六號尾禡，商界、公司同好多家庭都非常重視，唔少仲買定海味應節添。中環鏞記酒家老闆甘健成早排就親身落場去上環海味街入貨為尾禡做準備，佢掃咗好多貴價海味，好似花膠、吉品鮑、金山勾翅、冬蟲夏草等。
甘老闆首先走入一間叫「生源」嘅海味舖，二話不說就拎起兩塊每斤九千蚊嘅特大公肚（花膠）出門口舉高照吓照吓，佢話花膠要揀魚公肚，照起嚟金黃通透，睇落要「清水」（冇雜質），咁就為之上品花膠。靚鮑魚又點揀呢？甘老闆就以吉品鮑為例，強調要「腰圓背厚」，表面要有「一線天」橫紋，而鮑魚底部平滑程度好似用手甩麻雀「白板」咁平滑，至算係靚貨。
魚翅方面，甘老闆就選用三千八百蚊一斤嘅金山勾翅王，佢話勾翅要揀「淨頭」，「翅頭」有尖角代表有骨，咁就冇咁好嘞，而勾翅要乾身、身厚，針翅先會粗身，入口彈牙。咁冬蟲夏草又點揀呢？佢話要揀粗身、大條嘅。大家收唔收到？