政務司司長唐唐成日詞不達意，尋日佢出席香港青年協會搞嘅政制發展分享會，喺二百個青年面前再次出醜，想講政改方案諮詢期仲有三個禮拜就結束時，講咗「仲有三小時就完」，佢對政改諮詢有幾上心真係可想而知。
尋日班「80後」向唐唐提出嘅問題都幾有水準，有個學生問佢：「假如你二○一二年參選特首，有六百五十個選委要求你支持一個方案，但有六百五十萬市民反對，你會如何取捨？」唐唐當堂口窒窒話：「如果……如果……如果我選特首……」，慢咗兩拍之後，先識得改口話自己依家只會做好政務司司長嘅工作，所以同學嘅問題係唔會產生喎。
佢公開發言多次出事，之前評論酒店結業令大批旅客被迫寄居社區中心，好輕佻咁形容班旅客係「條條fing」已經係經典，之後又試過將昂坪360吊車直譯為「三碌齡」，真係貽笑大方。