又到年尾，富貴黨新界東支部尋晚食團年飯，黨主席劉健儀（Miriam）、副主席「肥仔張」張宇人同方剛、常委田北辰以及久未露面嘅「莎姐」周梁淑怡都有出席，晚飯雖然由支部主席方國珊做東，但前主席田北俊就出一支六公升巨支裝英國紅酒款客。
田少支巨裝紅酒係喺英國買番嚟，值四百英鎊，即約五、六千蚊港幣，容量相等於八支0.75公升普通裝紅酒。田少親手主持開瓶禮，細心倒落decanter（醒酒器），畀啲酒「出氣」一粒鐘後，兩個decanter同一個水勺裏面嘅紅酒，好快被黨友掃光，好多黨友一到場就試飲咗先。
田少發言時祝大家虎虎生威，又話諗起田二少係虎年出世。今年六十歲嘅田二少畀大哥踢爆年齡秘密，即刻話自己係「70後」，即三十六歲喎。