尋日首個會議係雷曼聆訊，社民連嘅梁國雄本來喺成員之一。聆訊一開始，雷曼小組主席何鍾泰就宣布，因為長毛嘅離開，小組成員由二十一個減到二十個，法定人數亦由七位變成六位。換言之，將來流會機會低咗，尤其係朝早九點半開嗰啲。

保安哥哥有憂慮

晏晝嘅內務委員會都即刻有新氣象，平時內會冇乜特別嘢傾都可以搞個幾鐘都未完，尋日個會即使有就全體議員嘅定義引起爭拗，但只算係一陣小漣漪，半粒鐘就開完，準時三點交番個會議廳畀財委會，呢支歌仔都好耐冇唱過咯！

至於財委會，尋日繼續審議因為高鐵積壓嘅撥款案，會內少咗善於拉布嘅社民連三子後，幾有爭議性嘅議題都好快講完，結果一粒鐘多啲就投埋票鬆人。睇嚟議會首日已反映冇掟蕉、爆粗等風頭議員嘅效率。

議員笑哈哈，保安哥哥就有憂慮，事關早排立法會保安抬長毛出議事廳，搞到有人受傷，事後秘書處增聘咗啲後生、有力嘅保安員，講明佢哋嘅作用係應付日益增多嘅突發場面，但公社五人辭職，呢啲新保安員暫無用武之地；亦有保安員擔心，公社五人離開議會之後，第日可能以旁聽者身份去議事廳二樓鬧事，到時唔知用乜嘢態度對待佢哋。