小白觀點：安全系數貼近第三世界

香港地周街都係鏹魔，真係防不勝防；警方捉極都捉唔到，幾乎投晒降。話口未完，日前又天降鏹雨，大家當然以為又有鏹魔出沒啦，原來只不過有人用鏹水通渠，唔知係落重咗手吖，定係喉管太舊灼熔咗，搞出一場虛驚嚇餐死。

特府高官成日發住「紐倫港」夢，好心啦，你有冇見過華爾街有人掟鏹彈，搞到馬多夫中正頭彩吖？話時話，唔知大家有冇發覺，自從煲呔曾上台之後，香港嘅安全系數反而愈嚟愈貼近第三世界水平，昂坪三碌拎吊車成架撻落地，亡命小巴又周圍殺人，尋日仲誇張，成棟樓都可以冧埋落嚟，仲好意思叫「紐倫港」，叫「太子港」就差唔多。

網友觀點......

客迭

真係嚇死人冇命賠……其實有心同無意分別唔大，唔會因為唔覺意而殺傷力低啲㗎嘛。

小炳

鏹魔神出鬼沒，啲天眼又冇料到，怕且要出埋間諜衞星先搞得掂！

三爺

鏹魔回歸只係遲早嘅問題，無助嘅小市民只好嘆句無奈。

匿名

啲警察做咩㗎？唔係淨係識做戲呀？

網址：www.sunsiupak.blogspot.com

阿豪觀點：為真鏹魔提供作案靈感

嘩，又有鏹魔出沒？唔係，睇真啲，原來只係因為有住戶倒通渠水而意外灼爛膠喉管，搞到鏹水雨灑落街，引起虛驚一場啫。唉，有時諗諗吓，香港人壓力真係好大，乜嘢都驚一大餐，少啲腦細胞都唔掂呀！

原來只係虛驚，咁都好啲……咦，咪住先，雖然唔係鏹魔所為，但係唔係意外同破壞力係兩回事，試問大家會唔會因為交通意外撞死人，發覺個司機唔係尋仇而鬆一口氣呢？

仲有呀，今次話就話係意外啫，但會唔會為真正鏹魔提供下次作案嘅靈感呢？連掟嘢落街呢個過程都慳番，索性周圍去灼爛大廈嘅膠喉管，到時就可以嚟個仙女散花，咁就死得人多咯。

網友觀點......

海公公

搞事年年有，今年特別多！政客搞起義，鏹魔搞回歸又有乜出奇啫！

五金佬提

鏹水周圍可以買到，一念之差就可以成魔，要滅絕大小鏹魔睇怕都幾難。

鬼仔

雖然今次係虛驚一場，不過一日未捉到人，大家一日都心驚驚~~

公孫先生

嗰啲咁嘅天眼，似足啲搞事議員咁有姿勢冇實際，嘥氣！

網址：www.lukchiho.blogspot.com