唉，香港家陣直頭係危城一座，個個聞「鏹」色變，愈來愈冇安全感。出街唔知幾時輪到自己中招，灼傷皮膚事小，唔好彩嘅分分鐘破相毀容都有之。最慘就係，第一次鏹水彈空襲鬧市到依家已經一年幾，鏹魔係邊個冇人知，甚至連影都冇人見過。

鏹魔隨時喺左近，警方一戙都冇。市民惟有「自動調高警戒級別」，出街戴鋼盔、行路擔番把遮、盡量行埋騎樓底，總之盡量避開失驚無神飛落嚟嘅鏹水彈。

嗱，等太一叮過條煞食橋畀各位啦。有冇見過墨西哥帽吖？冇錯，就係成個水缸蓋咁大嘅闊邊帽嘞。不過淨係頂帽唔夠㗎，仲要配搭埋一條又係墨西哥人必備嘅大披肩，由頭到腳包到密密實實，咁就萬無一失。咦，咁香港咪周街都係「獨行俠」，個個變咗奇連伊士活，香港咪變埋「鏹水港」添？

千祈咪嫌呢套墨西哥行頭麻煩呀，嗱，鏹魔邊次唔係喺人流最集中嘅鬧市犯案？邊次唔係等人最多嘅時候犯案？鏹水彈冇眼亂咁飛，一掟落嚟腐蝕液四濺，閒閒地幾十人領嘢。鏹魔愈遲落網，就會愈多人中招，梗係要做到有備無患啦。

第日想辨認邊個係香港人，易過借火。嗱，邊個塊面、膊頭或手臂有曾被灼傷之後留低嘅麻點或者疤痕，咁就十有八九都喺《獨行俠勇鬥鏹魔黨》呢套港府導演嘅驚慄紀錄片入面出現過嘞，係咪好易認呢？

叮！唔講政府猶自可，講開把幾火。由前年年底到依家，全港已經發生咗多宗鏹水彈空襲，旺角、銅鑼灣、油麻地鬧市先後「淪陷」。但呢個跛腳鴨政府對鏹魔冇晒符，早排捉到涉嫌同銅鑼灣擲鏹傷人案有關嘅疑犯，據講只係有樣學樣嘅「翻版鏹魔」。元兇仲未落網，市民人心惶惶，商戶冇啖好食。

警方除咗裝幾隻「白內障天眼」敷衍下市民，增加懸紅表示下「重視」之外，乜都做唔到，就好似對住空氣耍拳，得個睇字。呢，尋日有議員質疑警方對鏹魔束手無策，警隊「一哥」鄧竟成回應話，破案存在「三大困難」：冇人證、兇徒同受害人互不相識、難以鎖定犯案地點喎。

上次保安局就話每次事出突然，搵唔到目擊證人，難以鎖定目標兇徒，呢次警方又提出類似嘅「困難」。講嚟講去，無非係為破案不力推卸責任啫。旨意佢哋破案，蚊都瞓啦。

鏹魔愈掟愈快樂，隨時食過翻尋味。鏹彈恐怖一日未除，市民出街要提心吊膽，遊客更加望而卻步，冇人敢嚟。再咁落去，金融海嘯第二波未到，香港已經自己陰乾，想唔死都難啦！叮！