政府講過泛民主派「五區總辭」而要進行嘅補選涉及開支達一億五千萬元，政府同建制派均狠批泛民濫用補選程序兼浪費公帑。向來敢於針砭時弊嘅馬會主席阿John陳祖澤，當日就副局政助風波炮轟煲呔曾「政治蠢材」後，尋日主持葉庚年教育基金助學金頒發典禮時再度發聲，批評泛民嘅「起義」口號唔恰當，而辭職議員再參加補選亦係勞民傷財。
不過，阿John重申離開官場咁耐，貫徹「不在其位，不謀其政」，但既然被人問到，先講番兩句喎。其實覺得泛民浪費公帑嘅大有人在，好似行政會議成員查史美倫尋日都話，立法會議員絕對有自由辭職，但佢質疑點解議員辭職後又再參加補選呢？政府要動用一億五千萬元公帑進行補選，佢話確係浪費公帑，是對是錯，相信市民會自行判斷。