民協嘅立法會議員KK馮檢基早前收集議員簽名，希望議員支持唔食藍鰭吞拿魚，但過半數議員都同藍鰭吞拿魚過唔去。
環境局局長邱騰華回應有關質詢時話，今年三月喺卡塔爾舉行嘅《瀕危野生動植物物種國際貿易公約》大會，會討論係咪將嚟自大西洋嘅藍鰭吞拿魚列為瀕危物種，但依家販賣呢種魚唔係犯法，將來啲禁令亦唔包括嚟自其他產地嘅藍鰭吞拿魚，當局會喺修例前後加強與業界溝通同公眾教育宣傳。
飲食界嘅張宇人話，建議納入規管嘅只係大西洋出產嘅藍鰭吞拿魚，唔包括嚟自太平洋嘅同種魚類；漁農界嘅黃容根亦話將來販賣本地飼養嘅藍鰭吞拿魚亦唔屬違法。
聽佢哋咁講，即係唔禁其他地方嚟嘅就得啦，繼續有得食，而邱騰華證實呢點，仲話喺製成魚生後，一般食客好難分辨，當局會循監控來源地同入口准許證着手監管，定期派人巡查市面有冇出售瀕危物種。咁即係話，政府可以做嘅嘢好有限囉！