證監會前高層高秉忠前日喺立法會雷曼迷債小組委員會爆大鑊，仲大讚當年做證監副主席嘅Laura查史美倫好有金融監管經驗，又敢於向政府據理力爭。Laura亦話同高秉忠好熟落，當年嘅工作關係又好密切，但對雷曼事件就唔評論嘞。
Laura喺內地同香港中港兩地證監會服務咗十幾年，在任香港證監會期間跟過四位主席，喺中環財經界打滾多年，佢話以前好鍾意着高踭鞋喺中環周圍踢，都幾攰吓㗎，但冇辦法啦，貪靚嘛！當年着高踭鞋為主，所以佢十幾年前買落嘅平底鞋得個擺字，依家終於重見天日。
老實講，佢現為行會成員，仲係港區全國人大代表，仲擔任港交所獨立非執董，份份公職都好吃重，但佢話工作量唔算大，得閒約吓朋友食飯，放假就去旅行輕鬆吓，生活好優游！