前日公、社兩黨發動五名議員遞咗辭職信，但尋日喺建制派杯葛下令立法會大會流會，佢哋連最後嘅發言都要吞番落肚。之前佢哋大大聲話唔係戀棧權位，但公文袋兩個辭職議員竟然一個屈尾十入番會議廳。仲話唔戀棧？
事緣喺會議完結後，陳淑莊同袋巾傑不約而同咁話應該返入議事廳影番張相，仲叫埋助理跟埋入去。其實陳淑莊當時都有諗到係咪可以咁大搖大擺入去影相，但袋巾傑就話既然佢哋嘅辭職仲未生效，入去影相都冇乜唔妥。
點知當袋巾傑擺好「甫士」等助理幫佢影「最後一照」時，立法會保安就急急腳走入去，話會議已經完結，如果議員要影相，就要先向秘書處申請得到許可先得，邊個都冇情講。食正檸檬，袋巾傑惟有面懵懵咁拉番啲助理走。好彩事後秘書處肯畀佢哋影，否則就連食兩次檸檬嘞。
除亂影相唔守規矩外，袋巾傑連聽記者發問都斷章取義。話說有個講普通話嘅記者問佢哋點應付建制派嘅杯葛，袋巾傑聽到佢講煲冬瓜，即時好開心咁話連中央電視台都關注五區總辭嘅情況，搞到女記者好尷尬咁澄清。真係瘀爆！