本來公社兩黨五名議員尋日喺立法會大會宣讀辭職宣言，但建制派杯葛離場搞到流會，辭職議員嘅最後一騷被搞砸，但立法會仲有好多手尾要跟，例如尋日未完成嘅議程要押後到下個禮拜三嘅大會處理，包括要政府解釋乜嘢係深層次矛盾嘅動議。
深層次矛盾呢個動議辯論擺明係衝住煲呔曾而嚟，但動議人係遞咗辭職信嘅社民連議員「大舊」陳偉業，若果佢唔收番封辭職信，今個禮拜五辭職生效，大舊喺下個禮拜唔可以喺大會提出，變相煲呔曾乜都唔使做嘞！
其實，經過立法會流會一役，建制派議員全程自編自導自演，政府得個睇字，嚟緊否決補選撥款一役，政府更加無緣置喙，不論結局係建制派拚死去盡，否決撥款，定係虛張聲勢，臨陣煞車，主動權都喺建制派議員手上，政府可以收檔收工。
煲呔曾淪為閒角，換個角度，對佢未必係壞事，佢可以成日入元朗歎奶茶王、去西環坤記菜館食煲仔飯囉。再唔係，打電話畀因帶朋友玩轉禮賓府而正在休假待查嘅好客家丁，約齊成班「80後」喺禮賓府攞正牌開BBQ大會，與民同樂，以另類方式做好呢份工。