話說當日反高鐵人士衝擊立法會，Eva同班議員被困大樓六粒鐘，之後由警察築人鏈護送佢哋搭港鐵落荒而逃，當晚有議員喺「逃走」時畀「80後」示威者用水樽掟中，而中頭獎嘅就係「IQ博士」黃宜弘。仲記得佢事後話樽內淨係得幾滴水，冇乜殺傷力。聽佢講得咁輕鬆，原來佢屈住好耐，尋日喺立法會保安事務委員會嘅特別會議上，仲乘機抽水吐烏氣添！

本來係警方交代番○九年嘅治安情況，IQ博士就開腔向警隊一哥「特警成」鄧竟成投訴話依家班「80後」嘅示威行動愈演愈烈，好似之前反高鐵示威咁，又衝擊警方防線，又向議員掟嘢，質問到底班「80後」嘅行為係咪違法，當局又可以點跟進。

雖然IQ博士冇指名道姓邊個中頭獎，但大家心知肚明佢講嘅係自己。特警成唔知係冇諗過IQ博士會當面投訴定真係諗唔到辦法解決，結果都全程背書，話警方會尊重市民嘅言論自由云云，至於係咪違法？特警成亦冇正面回應，只係話有證據嘅話，定會交畀律政司跟進，如果證明有人要因為咁而需負責任嘅話先會檢控。

遊行質詢又提申訴

耍官腔添！IQ博士當然好唔滿意，但礙於時間有限，佢冇得跟進落去，但偏偏又畀佢碰到第二個黃金機會喎！就係有議員喺立法會大會提出關於元旦大遊行嘅質詢時，又畀佢攝到位提出申訴。

但唔好彩嘅係回應質詢嘅保安局局長李少光同特警成講嘅冇乜分別，答咗嘅係，已經有同搞示威嘅主辦單位做好溝通，對做出過激行為嘅示威者亦都予以譴責，之後有需要可能唔會畀涉事嘅單位再申請搞示威。

好明顯，IQ博士吐完冤屈後都係嘥口水。求人不如求己，睇怕佢下次遇到啲咁嘅情況，都係自備頭盔安全啲嘞！