小白觀點：冇碇住不如去立會外紮營

係人都知香港樓價離晒譜，但勢估唔到會癲成咁，連公屋都可以賣到近二百萬，仲有乜嘢好講呢？計我話，都唔係冇嘢好講嘅，譬如話講句十八個字嘅粗口，應該可以平衡一下心理嘅。其實香港地價高成咁，都係香港人自己嘅共業，天大地大咁多地方，點會話冇容身之所，為乜係都要真金白銀非「上車」不可呢？

講真吖，使乜咁笨聽煲呔曾點搬去冇雷公咁遠屈就吖，冇地方住，大不了咪去立法會門外紮個營吖，嗰度風涼水冷，仲有大棚警員全副武裝做「實Q」，就算有港女埋身都有人擋幾巴。若然住厭咗咯喎，咪考慮禮賓府囉，得閒BBQ、賞錦鯉，呢啲咪叫做Quality Of Life囉！

網友觀點……

排骨

根本政府由始至終都由佢升就算，離晒譜，唔怪得咁多民怨，啲「80後」反晒！

小白臉

無論交通景觀都一流，梗係漫開天價啦！其他公屋唔會咁猖狂啩！

等錢使

乜公屋原來咁值錢，我老竇嗰間咪……返去同佢斟斟先。

失業漢

住公屋一啲都唔失禮，想買番一間都唔係個個買得起o架！

網址：www.sunsiupak.blogspot.com

阿豪觀點：炒埋寮屋木屋想窮都幾難

煲呔曾口口聲聲話豪宅天價唔會影響小市民，當時大家已喝住，話水漲船高之下，低價樓嘅樓價都會升。呢嗱，話口未完，長沙灣舊公屋區李鄭屋邨廉潔樓一個無敵景觀高層單位，最近就以超過一百七十八萬元、貼近私人樓嘅高價售出嘞！

對於豪伯呢啲屋邨仔嚟講，呢個消息真係幾震撼。當年成班屋邨o靚仔一齊踢波，大家都咁窮，有雪條孖條都要兩份食，原來時至今日，住戶唔單止可以買番個單位，仲可以高價沽貨獲利，雖然錢唔係落我袋，但係睇到公屋已經「貴族化」，豪伯都已老懷安慰。睇吓幾時發展到出現「癲價寮屋」、「癲價木屋」嘅時候，港人想窮都難咯，yeah！

網友觀點……

炒家

呢排啲股市炒唔起，轉炒公屋仲易玩。

高跟鞋踩死

連公屋都要百幾二百萬？呢個係咩世界！以後更加咪使旨意上到車！

動“L”

估唔到依家連公屋都炒得起……我返屋企炒菜好過~~

海公公

會唔會係有心人炒高公屋價，令用家甘心去買同區啲私人樓呢？

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。

明日主題

港女惹不得